Авлигатай тэмцэх газар хөрөнгө, орлогын мэдүүлэг буюу ХАСХОМ-д хяналт шалгалт хийж төрийн албан тушаалтнуудын мэдүүлсэн орлогын мэдээлэл үнэн бодит эсэх болон түүнд тохирсон татварын хяналт шалгалтыг Татварын ерөнхий газартай хамтран хийжээ. Шалгалтаар зарим албан тушаалтны мэдүүлсэн орлого татварын тайланд тусгагдаагүй, эсвэл татвар дутуу төлөгдсөн зөрчлүүд илэрчээ. Авлигатай тэмцэх газрын 2025 оны үйл ажиллагааны тайланд дурдсанаар жилийн хугацаанд нийт 4.7 тэрбум төгрөгийн татварын зөрчилд 590.9 сая төгрөгийн төлбөрийг ноогдуулсан байна. Мөн авлига, ашиг сонирхлын зөрчлийн талаарх гомдлын хүрээнд хяналт шалгалт явуулж албан тушаалтнуудад хариуцлага тооцуулахаас гадна зарим байгууллага болон иргэдэд учирсан хохирлыг буруутай албан тушаалтнаар нөхөн төлүүлж 735 сая төгрөгийн хохирлыг барагдуулжээ.
Нийт 2025 онд шалгагдсан гэмт хэргийн улмаас 674 тэрбум төгрөгийн хохирол учирснаас 163 тэрбум 115 сая төгрөгийн хохирлыг нөхөн төлүүлсэн. Үл хөдлөх, хөдлөх, байр, орон сууц, автомашин, тоног төхөөрөмж зэрэг 84 тэрбум 674 сая төгрөгөөр үнэлэгдэх эд хөрөнгө болон бэлэн мөнгийг битүүмжлэн хамгаалсан байна.
Мөрдөн шалгах ажиллагаа явуулсан хэргийн шийдвэрлэлт 2024 онтой харьцуулбал 2.9 хувиар өсч, 2025 онд 225 авлигын гэмт хэрэг шүүхээр шийдвэрлэгдсэн нь өмнөх оны мөн үеэс 4.2 хувиар өссөн үзүүлэлттэй байна.
Discussion about this post