Монгол Улсын батлан хамгаалах салбарыг сурталчлах зорилготой “Эх оронч Монгол” сургалт, өдөрлөгийг 21 аймагт зохион байгуулж байгаа бөгөөд Төв аймагт өнөөдөр үргэлжилж байна.
Сургалт, өдөрлөгийн үеэр УИХ-ын гишүүн, Засгийн газрын гишүүн, Батлан хамгаалахын сайд Д.Батлут батлан хамгаалах салбарт хэрэгжүүлж буй бодлого, шийдвэр, үйл ажиллагааны талаар иргэд, алба хаагчдад мэдээлэл өгчээ. Тэрбээр Монгол Улсын Зэвсэгт хүчний боловсон хүчнийг дотооддоо бэлтгэхийн зэрэгцээ дэлхийн 11 улсад 500 орчим цэргийн алба хаагчийг сургаж, мэргэшүүлж байгааг онцоллоо. Тухайлбал, 2026-2027 оны хичээлийн жилд ОХУ, БНХАУ, БНЭУ, БНСВУ, БНТУ, БНСУ-ын цэргийн сургуульд 100 гаруй цэргийн алба хаагчийг суралцуулахаар сонгон шалгаруулж, үдэн мордуулжээ. Эдгээр алба хаагчийг нисгэгчгүй нисэх хэрэгсэл, хиймэл оюун ухаан, кибер аюулгүй байдал зэрэг орчин үеийн Зэвсэгт хүчний хөгжлийн чиг хандлага, хэрэгцээ шаардлагад нийцсэн мэргэжлээр бэлтгэж байгаа аж.
“Эх оронч Монгол” сургалт, өдөрлөгийн хүрээнд батлан хамгаалах салбарын бодлого, үйл ажиллагааг олон нийтэд танилцуулах уулзалт, Цэргийн төв эмнэлгийн хөдөлгөөнт багийн эрүүл мэндийн үзлэг, оношилгоо, Батлан хамгаалахын төв архивын лавлагаа үйлчилгээ, зэвсэглэл, цэргийн техникийн үзэсгэлэн, эх оронч хүмүүжил, Монгол цэргийн түүхийг сурталчлан таниулах зэрэг олон талт үйл ажиллагаа болж байна.
Эрүүл мэндийн тусламж үйлчилгээг иргэддээ улам ойртуулахаар хүрээнд Цэргийн төв эмнэлгийнхэн Төв аймагт ажиллаж, ЭХО, дотор, дотоод шүүрэл, мэдрэл, зүрхний үзлэг оношилгоо, лабораториор дамжуулан цусны ерөнхий, биохимийн, шээсний шинжилгээ, В, С вирусын шинжилгээг газар дээр нь авч, шаардлагатай үзлэг, зөвлөгөө, эмчилгээг хийж байгаа аж.
Discussion about this post