Ази, Номхон далайн олон улсын өргөн нэвтрүүлгийн холбоо (ABU)-ны Ерөнхий ассемблей Монгол Улсад нээлтээ хийлээ. “ABU” нь 66 улс, бүс нутгийн 226 гишүүн байгууллагыг нэгтгэсэн бөгөөд хөтөлбөрийн үйлдвэрлэл, өргөн нэвтрүүлгийн технологийн чиглэлээр харилцан хамтран ажилладаг. Жил бүр зохион байгуулагддаг энэхүү ассемблей энэ жил Ням гаригт /2025.09.14/ Улаанбаатар хотноо эхэлсэн бөгөөд “Үндэсний болон соёлын өвийг хамгаалахад хэвлэл мэдээллийн үүрэг” гэх сэдвийн дор өрнөх юм.
“ABU”-ийн дэд ерөнхийлөгчдийн нэг бөгөөд “NHK”-ийн гүйцэтгэх дэд ерөнхийлөгч Иноүэ Тацүхико нээлтийн ёслолд үг хэлэхдээ, “Өнөөдөр интернет орчин хуурамч, ташаа мэдээлэл болон зориудын худал мэдээллээр дүүрэн байна. Ийм нөхцөл байдалд олон нийтийн хэвлэл мэдээлэл үнэн, найдвартай мэдээлэл түгээхэд маш чухал үүрэг гүйцэтгэж байна. Бидний үүрэг өмнөхөөсөө илүү чухал болж буй энэ цаг үед бид итгэлтэйгээр урагшлах ёстой гэж би бодож байна” хэмээн онцоллоо.
Ассемблейн үеэр энэ жилийн “ABU”-ийн шагнал гардуулах ёслол болж, гишүүн байгууллагуудын хамгийн шилдэг радио, телевиз, дижитал контентуудыг шагнажээ. Нийт 318 бүтээл дотроос “NHK”-ийн гурван хөтөлбөр шагнал хүртсэн байна.
Эх сурвалж: News.mn
Discussion about this post