Жуулчид ихээр очих дуртай газруудын нэг болох Индонезийн Бали арал дээр өнгөрсөн даваа гарагаас эхлэн орсон борооны улмаас гол мөрнүүд эргээсээ хальж, үер усны гамшиг тохиожээ. Үерийн гамшгийн улмаас Бали арал дээр багадаа 14 хүн амь үрэгдсэн байна.
Мягмар гарагаас хойш Индонезийн онцгой байдлынхан орон байр нь усанд автсан олон зуун иргэдийг нүүлгэн шилжүүлсэн байна. Хөрсний нуралтын улмаас гол авто замууд хаагдаж, хоёр гүүр нуржээ.
Бали арал дээрх цаг уурын станц тус арал дээр 24 цагийн дотор 385 мм хур тунадас орсныг бүртгэжээ. Арал дээр байрлах зочид буудлууд, үйлчилгээний төвүүд, аж ахуйн нэгжүүдийн үйл ажиллагаа гамшгийн улмаас доголдож, замын ус зайлуулах хоолойнууд хог хаягдлаар дүүрсэн нь нөхцөл байдлыг улам хүндрүүлж байгаа аж.
Бали аралтай хөрш зэргэлдээ байрлах Зүүн Нуса Тенггара мужид үер усны гамшгийн улмаас багадаа 3 хүн амь үрэгдэж, 4 хүн сураггүй алга болжээ.
Борооны улиралд Индонезийн нутаг дэвсгэрт их хэмжээний хур тунадас орж, голууд үерлэх явдал элбэг тохиолддог ч уур амьсгалын өөрчлөлттэй холбоотойгоор үер усны гамшгийн давтамж ойртож, учруулах хор хохирол нь улам нэмэгдээд байгаа билээ.
Эх сурвалж: Anniston Star
Discussion about this post