УИХ-ын дарга Д.Амарбаясгалан МАН-ын даргад нэр дэвшихээ мэдэгдлээ

УИХ-ын дарга Д.Амарбаясгалан өнөөдөр МАН-ын даргын сонгуульд нэр дэвшихээ албан ёсоор мэдэгдлээ. Тэрээр “100 жилийн түүхтэй МАН-ыг хувь хүний бус хамтын удирдлагын байгууллага хэвээр хадгалах, 300 мянган гишүүдийн өмнө өгсөн амлалтыг биелүүлэхийн төлөө ажиллана” хэмээн онцолсон байна. Мөн найман жилийн турш намын Ерөнхий нарийн бичгийн даргаар ажилласан туршлагадаа тулгуурлан намын шинэчлэл, дэвшилтэт үзэл санааг хэрэгжүүлэх зорилт дэвшүүлжээ. МАН-ын Үндсэн дүрмийн 24.3-т “УИХ-ын сонгуульд нам олонх болсон бол намын даргыг Ерөнхий сайдад нэр дэвшүүлнэ” гэж заасан байдаг. Энэ заалт нь намын даргын өрсөлдөөнд нөлөөлөх эсэх талаар улс төрийн хүрээнд янз бүрийн байр суурь гарч байна. Зарим нь Ерөнхий сайд Г.Занданшатарын байр суурь илүү давуу гэж үзэж байгаа бол, нөгөө хэсэг нь намын дотоод ардчилал, өрсөлдөөнд шинэ боломж нээгдэж буй хэмээн дүгнэж байна. Ингэснээр МАН-ын удирдлагын сонгуульд өрсөлдөөн илүү ширүүсэж, намын дотоод эв нэгдэл болон улс төрийн тэнцвэрт байдалд чухал нөлөө үзүүлэхээр байна.