Малайзын Куала Лумпур хотын захын дүүрэгт өнөөдөр /2025.04.01/ хийн хоолой хагарсны улмаас томоохон гал гарчээ. Үндэсний нефтийн компани “Петронас”-ын мэдээлснээр гал өглөө 08:10 цагийн үед гарчээ. Галын улмаас Селангор муж улсын төв хэсэгт орших Путра Хайтс дахь шатахуун түгээх станцын ойролцоох айлуудыг нүүлгэн шилжүүлэв. Нөхцөл байдал тогтворжих хүртэл тэднийг ойролцоох исламын шашны сүмд байрлуулна гэв.
Нийт 500 метр орчим урт хийн хоолой галд өртжээ. Ойролцоох гурван ч шатахуун түгээх станц азаар түймэрт өртөөгүй байна. Гэхдээ урьдчилан сэргийлэх зорилгоор үйл ажиллагаагаа түр хугацаанд зогсоожээ. Гал түймэр унтраах, аврах багийнхан 41 хүний бүрэлдэхүүнтэйгээр 12 минутын дотор ирж, долоон хүн аварчээ. Хүний амь хохирсон мэдээлэл одоогоор ирээгүй бөгөөд түлэгдэж, бэртсэн хүмүүсийг эмчлүүлж байна.
Кампунг Куала Сунгай Бару дахь байшинд хүмүүс дарагдсан байгаа бөгөөд аврах ажиллагаа үргэлжилж байна гэж Селангорын Гамшгаас хамгаалах хорооны дарга Мохд Нажван Халими мужийн мэдээллийн Бернама агентлагт мэдэгдэв.
Эх сурвалж: Reuters
Discussion about this post