Үндэсний төлбөрийн системийг олон улсад нэвтрүүлэх алхам нь Монгол Улсын санхүүгийн зах зээлийг өргөжүүлэх, төлбөрийн дэд бүтцийг хөгжүүлэх, олон улсын стандарттай нийцүүлэхэд чухал үүрэг гүйцэтгэж байна. Хэрэглэгчдийн санхүүгийн хүртээмжийг сайжруулахаас гадна, Монгол Улсын төлбөрийн системийг бүс нутгийн болон олон улсын хэмжээнд өрсөлдөхүйц түвшинд хүргэхэд дэмжлэг болно.
Монголбанк нь 2010 оноос үндэсний брэнд ₮ картыг бий болгох санаачилгыг гарган, банкуудтай хамтран 2012 онд ₮ картыг амжилттай нэвтрүүлж байсан. Монголбанк нь Мастеркарт байгууллагатай M/Чип технологийн лицензийн гэрээг 2019 онд байгуулснаас хойш 2 жилийн хугацаанд хамтран ажилласнаар үндэсний брэнд ₮ картын нууцлал, аюулгүй байдлыг өндөр түвшинд хангасан EMV чип болон NFC зайнаас унших технологид шилжүүлсэн. Ингэснээр, чиптэй ₮ картад суурилсан QR кодоор гүйлгээ хийх, ₮ картын мэдээллийг токенжуулах (tokenization) зэрэг олон үйлчилгээний суурь тавигдсан юм. Мөн карт эзэмшигч ₮ картаараа нийтийн тээвэр, автомашины зогсоол, замын төлбөр гэх мэт үнийн дүн багатай гүйлгээг пин код ашиглахгүйгээр картаа зайнаас уншуулж төлбөр тооцоо хийж байна. Эдгээр алхмыг үе шаттайгаар хэрэгжүүлснээр үндэсний брэнд ₮ картыг олон улсад нэртэй Apple Pay үйлчилгээнд холбон ухаалаг гар утсанд суурилсан төлбөр тооцоо хийх боломжийг 2024 онд бүрдүүлсэн юм.
Ингэснээр 2025 оны 3 дугаар сарын 27-ны өдрөөс эхлэн Хонгконгд Үндэсний брэнд ₮ картыг төлбөр тооцоонд ашиглах боломж нээгдлээ. Одоогоор ₮ картын лого байршсан худалдаа, үйлчилгээний цэгт ашиглах боломжтой байгаа бол цаашид түргэн үйлчилгээний дэлгүүр, метро, такси зэрэгт ₮ картыг ашиглах боломжтой болно. Энэхүү ажиллагаанд Монголын финтек салбарын төлөөлөл “Бонум” ХХК чухал үүрэг гүйцэтгэсэн юм. “Бонум” ХХК нь Мастеркартын үндсэн гишүүн, үйлчилгээ үзүүлэгч хамтрагч болсон Төв Азийн анхны финтек компани юм.
Discussion about this post