Манай улсын нийгэм, эдийн засгийн хөгжилд чухал үүрэг гүйцэтгэдэг “Улаанбаатар төмөр зам” ХНН 2025 оны зорилтоо “Хүний нөөцийн тогтвортой хөгжлийг дэмжих жил”-ээр зарласан. Мэргэжилдээ чадварлаг хүний нөөцийн санг бүрдүүлэх зорилгоор өчигдөр “УБТЗ” ХНН-ийн Удирдлагын асуудал хариуцсан замын орлогч дарга М.Цогт болон БНХАУ-ын Бээжингийн Зам харилцааны их сургуулийн дэд захирал Гао Лианг нар 2025-2026 оны хичээлийн жилд “УБТЗ” ХНН-ийн захиалгаар Бээжингийн Зам харилцааны их сургуульд оюутан суралцуулах хамтын ажиллагааны гэрээнд гарын үсэг зурлаа. Гэрээнд гарын үсэг зурахад “УБТЗ” ХНН-ийн Хүний нөөцийн албаны дарга С.Цэвээндорж болон талуудын бусад албаны хүмүүс байлцлаа.
Бээжингийн Зам харилцааны их сургууль нь 130 жилийн түүхтэй дэлхийн нэртэй том их сургуулиудын нэг юм. Тус сургуульд 30 мянган оюутан суралцдаг бөгөөд энэ хичээлийн жилд манай улсаас 100 гаруй оюутан суралцаж байна. Тэдгээр оюутны 54 нь “УБТЗ” ХНН-ийн захиалгаар суралцаж байгаа юм. “УБТЗ” ХНН нь 1996 оноос хойш Бээжингийн Зам харилцааны их сургуульд төмөр замын мэргэжлийн боловсон хүчнээ бэлтгэж иржээ.
Discussion about this post