Өмнөд Солонгосын олон зуун иргэн нийслэл Сөүл дэх АНУ-ын Элчингийн байрны ойролцоо “No Trump!” жагсаал өрнүүлж байна. Эндээс хэдэн зуун метрийн цаана Кёнбокгун ордны үүдэнд ч жагсаал үргэлжилж байгаа бөгөөд тэд “No China”, “Chinese Communist Party out!” гэсэн уриа лоозонгоороо ялгарч байна. Өмнөд Солонгосын ерөнхийлөгч Ли Жэ Мён энэ долоо хоногт АНУ, Хятадын удирдагчдыг хүлээн авч буйтай энэ хөл хөдөлгөөн холбоотой.
Жагсагч 22 настай Ким Сол И Трампын мөнгөөр бөөлжиж буй зурагтай далбаа барьж иржээ. Тэрбээр “Трамп Өмнөд Солонгосыг мөнгөний машин гэж хэлсэн нь намайг ихээхэн бухимдуулсан. АНУ бидний мөнгөний үнээ гэж харж, асар их хөрөнгө оруулалт гуйж байна. Үнэнийг хэлэхэд АНУ биднийг тэгш эрхтэй түнш гэж харж байгаа эсэх нь эргэлзээтэй” гэжээ.
Гэхдээ бүх солонгосчууд Ким Сол И шиг боддоггүйг анхаарах хэрэгтэй. Тус улсын 10 хүн тутмын ес нь АНУ-ыг хамгийн чухал түнш гэж хардагийг “Pew Research Centre”-ийн судалгаагаар нотолжээ. Гэхдээ энэ судалгааг Жоржиа дахь “Hyundai”-ын үйлдвэрийн баривчилгаанаас өмнө авсан аж.
Харин тус судалгаанд оролцогчдын 30 гаруй хувь нь Хятадыг хамгийн том аюул заналхийлэл гэж харж буйгаа хэлсэн байна.
Жагсагч 27 настай Пак Да Сум “Би өнөөдөр Өмнөд Солонгосыг хайрласандаа энд ирсэн. Өмнөд Солонгосыг хамгаалах гэж энд ирсэн. Манай улс Хятадын нөлөөнд аажмаар автаж эхлээд буй мэт санагдах боллоо. Мэдээж тодорхой хэмжээнд дипломат харилцаа байх ёстой. Бидэнд таалагдахгүй байгаа зүйл бол Хятадын Коммунист нам” гэсэн юм.
Өмнөд Солонгос бол эртнээс нааш АНУ-ын гол түнш байсан улс. Солонгосын дайны үеэр америк цэргүүд Умардын довтолгоог сөрөхөд нь тусалж байсан тул хоёр орны удирдагчид өөрсдийн харилцаагаа “цусаар бэхжсэн нөхөрлөл” гэж хэлэх нь бий. Өмнөд Солонгост АНУ-ын дэмжлэг одоо ч хэрэгтэй.
Үүний зэрэгцээ хамгийн том худалдааны түнш, экспортын чухал зах зээлтэй Хятадтай ч эвсэг байх шаардлагатай. Дэлхийн олон улс Хятад, АНУ хоёроос эдийн засгийн гүнзгий хамааралтай болоод буй өнөө үед Ли Жэ Мён ухаалаг маневр хийхийг хичээсээр байна. Ли энэхүү хүчин чармайлтын хүрээнд Трамп, Ши Жиньпин нарын уулзалтыг хүртэл эх орондоо зохион байгуулах гэж байна.
ЭХ СУРВАЛЖ: BBC
Discussion about this post