Сар бүр Үндэсний статистикийн хорооноос төвийн зургаан дүүрэгт худалдаалж буй шинэ, хуучин орон сууцны нэгдсэн үнийн мэдээллийн танилцуулдаг билээ. 2025 оны наймдугаар сарын байдлаар ҮСХ-ноос гаргасан шинэ, хуучин орон сууцны үнийн индекс гарчээ.
Сүүлийн жилүүдэд байрны үнэ нэмэгдэх болсныг мэргэжилтнүүд ипотекийн зээлтэй холбон тайлбарлах болсон. Судалгаагаар 2013 оноос хэрэгжиж эхэлсэн ипотекийн зээлд өнөөдрийн байдлаар улсын хэмжээнд 130 гаруй мянган өрх хамрагдсанаас 60 хувь нь дахин ипотект хамрагдаж хоёр, гурав дахь байраа авчээ. Энэ оны эхний найман сарын байдлаар ипотекийн зээлийг 6200 орчим иргэнд олгожээ. Нийтдээ 800 орчим тэрбум төгрөгийн зээлийг ипотекийн журмаар гаргасан байна. Монголбанк, арилжааны банк, Хуримтлалын сангийн хамтарсан эх үүсвэрээр энэ онд 1.2 их наяд төгрөгийг ипотекийн зээлд гаргахаар төлөвлөжээ. Өөрөөр хэлбэл, 400 тэрбум төгрөгийг энэ ондоо багтааж гаргана гэж харж болно.
Иймд орон сууцны индекс жил ирэх тусам нэмэгдэж байгаа хэдий ч 2025 оны наймдугаар сард 1.33 болж, өмнөх оны мөн үеэс 15.9 хувиар өссөн байна. Харин өмнөх сартай харьцуулбал 1.2 хувиар өссөн аж. Орон сууцны насжилтаар авч үзвэл, шинэ орон сууцны үнэ өмнөх оны мөн үеэс 16.8 хувь байгаа бол хуучин орон сууцны үнэ өмнөх оны мөн үеэс 15.6 хувиар тус тус өссөн үзүүлэлт гарчээ.
Шинэ орон сууцны 1 метр квадрат талбайн үнэ нийслэлийн Сүхбаатар дүүрэгт 5.40 сая төгрөг, Хан-Уул дүүрэгт 4.73 сая төгрөг, Баянзүрх дүүрэгт 4.57 сая төгрөг, Чингэлтэй дүүрэгт 4.57 сая төгрөг байна.
Харин Баянгол дүүрэгт 4.49 сая төгрөг бол хамгийн хямд шинэ орон сууц нийслэлийн Сонгинохайрхан дүүрэгт 3.35 сая төгрөгөөр худалдаалж байна. Түүнчлэн, хуучин орон сууцны үнэ мөн адил Сонгинохайрхан дүүрэгт хамгийн хямд өртөгтэй байгаа бөгөөд нэг метр квадратын үнэ 3.21 сая төгрөгийн үнэлгээтэй гарчээ. Өөрөөр хэлбэл, орон сууцны үнэ өндөр байгаа нөхцөлд бага орлоготой иргэд байртай болох боломж хомс. Тиймээс Засгийн газраас зарлах ипотекийн шалгуур олон хүнд хүлээлт үүсгээд буй.
Discussion about this post