Өнгөрсөн жилүүдэд гэр хорооллыг дахин төлөвлөн, ашиглалтын шаардлага хангахгүй орон сууцуудыг буулгаж, дахин төлөвлөлтөд оруулж байгаа билээ. Зарим ажил гүйцэтгэгч компанийн хариуцлагагүй үйлдлээс болж иргэд их хэмжээгээр хохирох тохиолдол гардаг.
Тухайлбал, Сүхбаатар дүүргийн 6 дугаар хороонд 21, 22 дугаар байрыг ашиглалтын шаардлага хангахгүй байна гэж үзэн дахин төлөвлөх ажил 2018 онд эхэлсэн байна. 2018-2021 оны хооронд нийт 13 удаагийн сонгон шалгаруулалт зарлаж, улмаар төслийн гүйцэтгэгчээр “Уран проект” ХХК шалгарчээ. “Уран проект” компани 2022 оны тавдугаар сард тус хорооны 22 дугаар байрыг нураасан боловч өнөөдрийг хүртэл огт барилгын ажил хийгээгүй аж. Өөрөөр хэлбэл, СБД-ийн 6 дугаар хорооны 22 дугаар байрны 400 гаруй иргэн хохироод байгаа ажээ.
2022 оны тавдугаар сард 64 айл гэрээний дагуу байраа долоо хоногийн дотор чөлөөлж, хуучин барилгыг нураасан байна. Гэвч энэ хугацаанд барилгын талбайг тойруулж хашаа барьснаас өөр зүйл хийгдээгүй юм байна.
Уг асуудлыг “Улаанбаатар орон сууцжуулалт” ХХК хариуцахаар болж, тус байрны оршин суугчидтай уулзсан байна. “Улаанбаатар орон сууцжуулалт” ХХК-ийн гүйцэтгэх захирал З.Төмөртөмөө “Ашиглалтын шаардлага хангаагүй орон сууцтай холбоотой асуудал их байна. Үүний нэг нь СБД-ийн 6 дугаар хороонд байрлах “Уран проект” ХХК-ийн хариуцаж авсан уг төсөл юм. Дөрвөн жилийн хугацаанд ямар ч ахиц байхгүй байна. Одооноос эхлэн нийслэл энэ асуудлыг хариуцаж, иргэдийг түр орон сууцаар хангаж, барилгын ажлыг богино хугацаанд дуусгахаар ажиллана. Иргэдийн эрх ашгийг хамгаалахын тулд төр өөрөө иргэдтэй гэрээ байгуулж, төслийг удирдана. Сонгон шалгаруулалтыг энэ долоо хоногт зарлаж, чадамжтай компаниудыг оролцуулна. Мөн 2020-2021 онуудад хэд хэдэн төслийн гүйцэтгэгчээр шалгарсан луйврын шинжтэй “Уран проект” ХХК-г хууль хяналтын байгууллагад шалгуулна” гэдгийг хэлэв.
Discussion about this post