Мьянмарт хэт халсны улмаас аврах ажиллагаанд хүндрэл учирчээ.

Мьянмарт 7.7 магнитудын хүчтэй газар хөдлөлт болсноос хойш гурав хоногийн дараа аврах ажиллагаа үргэлжилж байна.

Амиа алдсан хүмүүсийн тоо урьдчилсан байдлаар 2056 болж, 3000 гаруй хүн шархадсан гэж тэндхийн цэргийн засгийн газар мэдээлсэн ч Мьянмараас мэдээлэл авахад хэцүү байгаа бөгөөд гамшгийн цар хүрээний талаар нарийвчилсан мэдээ гараагүй байна.

Мягмар гарагт нэг минут чимээгүй зогсохын зэрэгцээ долоо хоног үндэсний гашуудал зарлана гэж мэдэгдлээ.

Дөрвөн жил үргэлжилсэн иргэний дайны дунд байгаа тус улсад газар хөдлөлт “аль хэдийн аймшигтай хямрал”-ыг улам бүр нэмэгдүүллээ гэж НҮБ мэдэгдэв. Хэдийгээр сүйрсэн ч Мьянмарын армийн удирдагчид ардчиллыг дэмжигч босогчдын бүлэглэлийн эсрэг агаараас цохилт өгсөөр байна.

Газар хөдөлснөөс хойш гурван хоног өнгөрсөн тул нурангин дороос амьд үлдсэн хүмүүсийг аврах найдлага бараг үгүй болсон тухай мэдээлжээ. Түүнээс гадна +40 хэм хүртэл халж байгаа учраас эрэн хайх, аврах ажиллагаанд хүндрэл учирч байна. Газар хөдлөлтийн голомтоос холгүй орших Мандалай хотод хэт халсны улмаас цогцсууд ялзран задарч байгаа учраас амиа алдсан хүмүүс хэн болохыг тогтооход хүндрэлтэй болжээ.

Дэлхийн Эрүүл мэндийн байгууллагаас мэдэгдэл гаргаж, иргэний дайнд нэрвэгдсэн тус улсад халдварт өвчин тархах аюул нэмэгдэж байгаа учраас онцгой байдлын хамгийн өндөр түвшний сэрэмжлүүлгийг зарлалаа. Одоогоор нэн яаралтай тусламж үзүүлэх, эмнэлгийн үйлчилгээг сэргээхэд 8 сая ам.доллар шаардлагатай байгааг ДЭМБ мэдэгдсэн байна.

Мьянмарын цэргийн хунтын засгийн газрын тэргүүн Мин Аун Хлайн “улс орон бүрийн, байгууллага бүрийн тусламж шаардлагатай” байгааг дурджээ.

Гуравдугаар сарын 28-нд тус улсад 7,7 магнитудын хүчтэй газар хөдлөлт болж, хөрш Тайланд, Хятад, Вьетнам улсуудад чичирхийлэл мэдрэгдсэн байна. Бангкок хотод барьж байсан 30 давхар барилга нурж, 19 хүн амиа алдаж, 75 хүн сураггүй болжээ.