Хиймэл оюун ухааны тусламжтайгаар ойрын 10 жилийн дотор хүний эрүүл мэндийн асуудлыг цаг агаар шиг урьдчилан таамаглаж мэддэг болно гэдгийг эрдэмтэд хэллээ. Тодруулбал, бороо орох магадлал 70 хувь гэж таамагладагийн нэгэн адил хүний эрүүл мэндийг урьдчилан хэлэх юм.
“Delphi-2M” гэх энэхүү технологийн ачаар хүний 1200 гаруй өвчлөлийн эрсдэлийг урьдчилан тооцоолно. Мэдээж аравдугаар сард зүрхний шигдээс болно гэх зэргээр тодорхой хэлэхгүй ч гэлээ магадлалыг таамаглах юм. Ингэснээр хүмүүс өвчнөөс урьдчилан сэргийлэхээс гадна эмнэлгүүд бүс нутгийн эрэлт хэрэгцээг олон жилийн өмнөөс мэдэж авна.
“Delphi-2M” нь “ChatGPT” гэх мэт хиймэл оюун ухаант чатботтой ижил технологитой. Энэхүү загварыг Их Британийн Биобанкны судалгааны төслийн хүрээнд анх боловсруулжээ. Ингэхдээ 400 мянга гаруй хүний эмнэлэгт хэвтэн эмчлүүлсэн бүртгэл, амьдралын хэв маяг зэрэг мэдээлэл дээр тулгуурласан байна. Дараа нь Дани дахь 1.9 сая хүний эрүүл мэндийн бүртгэлийг ашиглан системийг туршиж үзэхэд амжилттай ажиллаж байжээ.
Тэр дундаа хоёрдугаар хэлбэрийн чихрийн шижин, зүрхний шигдээс, сепсис зэрэг өвчнийг илүү сайн таамагласан байна.
Цаашид зураг, генетик, цусны шинжилгээ зэрэг бусад нэмэлт мэдээллийн тусламжтайгаар илүү нарийн таамаглал дэвшүүлдэг болгохоор тус системийг хөгжүүлж байна.
ЭХ СУРВАЛЖ: BBC
Discussion about this post