Монголын циркчид өнөөдөр хаана бэлтгэл хийж байна вэ? Улсаас ямар дэмжлэг авч байна вэ? “Аса цирк” яагаад хувь хүний өмч болсон бэ? Энэ бүх асуултад бодитой хариулт өгөхийн тулд бид циркчдийн өнөөгийн нөхцөл байдлыг хөндлөө.
Улсын цирк яагаад хувьчлагдсан бэ?
2007 онд Монгол Улсын циркийн барилгыг менежментийн хувьчлалаар “Аса” багт шилжүүлсэн. Тус баг нь циркийг хөгжүүлэх амлалт өгч, тодорхой хэмжээний хөрөнгө оруулалт хийхээ мэдэгдсэн боловч 2008 онд уг барилга 100 хувь хувьчлагджээ. Ингэснээр циркчид бэлтгэл хийх газраа алдсан бөгөөд төрийн өмчийн циркчдийн хөгжих орчин үгүй болсон юм.
Хүүхэд залуучуудын очих дуртай газрын нэг Улсын цирк нь 1971 оноос хувьчлагдах 2008 он хүртэлх хугацаанд найруулагч, туслах найруулагч, зураач, туслах зураач, оёдолчин, цахилгаанчин, мужаан, бүжиг дэглээч, дархан гээд бүхий л мэргэжлийн хүмүүс ажилладаг байсан.
Өнөөдөр Монголын циркчид тогтмол бэлтгэл хийх зориулалтын байргүй болж, түрээсийн заал, спорт зааланд бэлтгэл хийхээс өөр аргагүйд хүрээд байна. Энэ нь тэдний ур чадварын хөгжилд сөргөөр нөлөөлж, олон улсын тэмцээн уралдаанд өрсөлдөхөд ихээхэн хүндрэл учруулж байна. Мэргэжлийн сургалт явуулах боломжгүйгээс болж циркийн урлагийн залгамж халаа тасрах аюул нүүрлээд байна.
Одоогоор циркийн уран бүтээлчдэд зориулсан төрөөс үзүүлэх тусгай дэмжлэг байхгүй бөгөөд циркийн сургуулийн шинэ барилга барих төсөв батлагдаагүй байгаа нь асуудлыг улам хүндрүүлж байна. Үүнээс болж циркчид гаднын улс орнуудад ажиллаж, эх орондоо бус, гаднын циркүүдэд ур чадвараа хөгжүүлэхээс өөр сонголтгүй болсон.
Монголын циркчдийн уран бүтээл, ур чадварыг хадгалж үлдэхийн тулд төрөөс дараах арга хэмжээг яаралтай авах шаардлагатай:
- Төрөөс циркчдэд зориулсан бэлтгэлийн орчин бүрдүүлэх
- Циркийн урлагийг хөгжүүлэх бодлого боловсруулах
- Циркийн сургуулийн шинэ барилга барих төсвийг батлах
- Олон улсын циркийн стандарттай дүйцэхүйц орчин бүрдүүлэх
Хэрэв энэ асуудалд анхаарахгүй бол Монголын циркийн урлаг мөхөх аюул ойрхон байна. Улсын циркийг алдсан ч циркийн уран бүтээлчдээ бид алдаж болохгүй!
Discussion about this post