Өмнөд Солонгосын тэргүүн хатагтай асан Ким Кён Хи зургадугаар сард баривчлагдсанаасаа хойш анх удаа олны өмнө гарч ирэв. Тэрбээр Пүрэв гаригт Сөүлийн нэгэн эмнэлгээр үйлчлүүлжээ. Бичлэг харвал Ким Кён Хи хоригдлын цэнхэр дүрэмт хувцас өмсч, амны хаалт, нүдний шил зүүсэн байдалтай тэргэнцэр дээр түрүүлэн гарч иржээ. Мөн зүүн хөлнийхөө шагайд электрон монитор зүүсэн байв.
Ким Кён Хи цочмог гипотензи, эсвэл цусны даралт гэнэт унаснаас болоод эмнэлэгт ирсэн байж магадгүй аж. Түүний өмгөөлөгчийн хэлснээр Ким Кён Хигийн даралт сүүлийн үед 35/70 болж буурч, толгой нь эргэх болсон гэнэ.
Эрүүл мэндийн байдлаас болоод түүний шүүх хурлын сонсгол хойшилж магадгүй байна. Эхний сонсгол ирэх Лхагва гаригийн 14:10 цаг товлогджээ. Ерөнхийлөгч асан Юн Сук Ёл ч бас эрүүл мэндийн шалтгаанаар сүүлийн үеийн сонсголуудад оролцоогүй.
Эргэн сануулахад, Өмнөд Солонгосын шүүх өнгөрсөн сарын 13-нд Ким Кён Хиг баривчлах шүүхийн захирамж гаргасан. Түүнийг хувьцааны ханшийг зохиомлоор өсгөсөн, улс төрийн процесст хөндлөнгөөс оролцсон, мөн хахууль авсан гэж буруутгаж байна. Энэ нь Өмнөд Солонгосын түүхэнд анх удаа ерөнхийлөгч асан болон тэргүүн хатагтай хоёулаа шоронд хоригдож буй тохиолдол болсон юм. Прокурорын мэдээлснээр, Ким Кён Хи мөрдөн байцаалтын үед зөрүүтэй мэдүүлэг өгснөөс гадна баримт устгах, бусадтай мэдүүлгээ тохиролцох магадлалтай гэх үндэслэлээр баривчлагдах болжээ.
ЭХ СУРВАЛЖ: KOREA HERALD
Discussion about this post