Эрчим хүчний салбар авлигачдын үүр болоод байсныг ард түмэн сая л мэдлээ. Хоёр долоо хоногийн өмнө сайд асан Н.Тавинбэхийг зөвлөх П.Товуудоржтой нь, ЗТХЯ-ны Төрийн нарийн бичгийн дарга Б.Насантогтох, Эрчим хүчний сайд Б.Чойжилсүрэнгийн зөвлөх Б.Нямаа зэрэг хамсаатнуудынх нь хамт баривчлан саатуулсан. Төрийн өндөр албан тушаал хашиж байсан эдгээр нөхөд 10 аймагт ДЦС барих төслөөс 2.6 саяам.доллар “цохьчихсон” хэргээр “аавын хаалга” татав.
Мөн “Эрдэнэс критикал минералс” ТӨҮГ-ын гүйцэтгэх захирал Д.Тогтохсүрэнг АТГ-ынхан хойшлуулшгүй ажиллагааны хүрээнд саатууллаа. Аж үйлдвэр, эрдэс баялгийн яамны Хяналт шинжилгээ, үнэлгээ дотоод аудитын газрын улсын ахлах байцаагч А.Бямбадорж, Хүннү хотын хөгжлийн корпорацийн инженер Б.Мөнхсайхан нарын гэр болон албан өрөөнд АТГ-ынхан нэгжлэг хийжээ. Хэвлэл, олон нийтийн сүлжээгээр энэ мэт баривчилгааны тухай мэдээнүүд хөвөрч байна.
Эрчим хүчний салбарын хулгайг илчилж, гэм буруутнуудыг нь баривчиллаа гэдэг энэ мэдээтэй зэрэгцээд нүүрсний хэргээр саатуулагдсан албан тушаалтнуудыг суллаад тавьж байгаа сураг дуулдаж байна. Тухайлбал, МАН-ын нарийн бичгийн дарга Ц.Чулуунзагдыг энэ долоо хоногт сулласан байна. Цаашилбал, Нүүрсний, Хөгжлийн банкны, төрийн олон тусгай сангуудын гээд хэдэн арван тэрбумын хэргүүд юу болсон билээ?
Авлигачдыг баривчиллаа гэдэг бол тэдэнд хариуцлага тооцчихлоо гэсэн үг биш. Бариа, тавианы жил гэдэг шиг “баривчиллаа, суллагдлаа” гэдэг сценариар олон түмний нүдийг “гурилаар хуурч”, авлигачидын толгойг илж ирсэн нь өнөөгийн энэ ялзрал, идээ бээрийг өөгшүүлж, ужигруулсан. Одоо үүнийгээ давтах юм бол МАН улс төрийн тавцангаас бүрмөсөн арчигдана.Авлигатайгаа, авлигачидтайгаа тэмцэхгүй бол непалдуулна гэдгээ МАН-ынхан мэдэрсэн бололтой. Ар араасаа шил дарсан баривчилгаануудаас ингэж уншигдаж байна.
Дахин хэлэхэд олон нийт сүр дуулиантай баривчилгааг авлигатай тэмцэж байна гэж харж, “шилний цаанаас чихэр долоож” молигодуулдаг цаг ард хоцорсон. Тэд илүү хэрсүү болсон. Тиймээс авлига, хулгайтай хийж буй тэмцлээ тултал нь хийж гүйцээн, гэм буруутнуудыгшударга ёсны шүүх, хуулийн өмнө дуудаж,хариуцлагаас бултах боломж олгохгүй байж чадаж гэмээнэ тэдний тэмцэл үнэн гэдэг нь нотлогдоно.
Өмнөх жилүүдэд нийгэм даяар дуулиан тарьж байсан олон хэрэг мартагдсан. Авлигачид хариуцлага хүлээсэн нь бараг үгүй. Үүнд ард иргэд, олон нийт дургүйцэж, бухимдаж буй. Тэд МАН авлига, хулгайтайгаа тууштай тэмцэх үү, бааштай загнах нь уу гэдгийг анхааралтайхарж байгаа.
Discussion about this post